Устав Всеволода о церковных судах

Устав великого князя Всеволода о церковных судех и о людех и мирилех торговых 1125-1136 г.
Се яз, князь великий Всеволод, нареченный в святом крещении Василий , правнук Игорев и блаженныа прабабы Олгы, нареченныя в святом крещении Елена и матере Володимеровы, нареченнаго во святом крещении Василий; и выя Господа прияли святое крещение от гречьскых царей и от Фотея, патриарха цареградьскаго взяше перваго митрополита Михаила (от земля трапизоньскыя к Белой Руси граду) Киеву, иже крести всю Рускую землю. Потом же летом многим минувшим, моляся Спасу и пречистей его Матери, святей Богородици, Приснодеве Марии, устроиша церковь святую Богородицю десятинную, и даша ей десятину в всей Рустей земли и с всех княжений, в соборную церковь святыя Богородица, иже в Киеве и святей Софеи Кеевъской и святей Софеи Новгороцкой, и митрополитом Кеевским и архиепископом Новгороцким, от всякого княжа суда десятую векшу, а ис торгу десятую неделю, а из домов на всякое лето от всякого стада и от всякого жита святому Спасу и Пречистей его Матери и Премудрости Божии святей Софеи.
Обретох в греческом номаканоне, что сих судов и тяжь не судити князю, ни его детем, ни его наместником, ни его боляром, ни его тиуном, ни десятинника не дрьжати; и по сему смотрению съзвал еемь десять сочких, и старосту Болеслава, и бирица Мирошку, и старосту Иваньковскаго Васяту, и погадал еемь с владыкою и с своею княгинею и с своими боляры и с десятью сотчкыми и с старостами ; дал есмь суд и мирила, иже на торгу, святей Богородици в Киеве и митрополиту, а в Новегороде святей Софеи и епископу и старосте Иваньскому и всему Новугороду мерила торговая, скалвы ващаныя, пуд медовый, и гривеньку рублевую, и локоть Иваньскый, и свой оброк купец черницам; а попу Иваньскому руской поруице пятно , да десять конюхов соли; а в тыи оброки не въступатися моим детям, ни моим наместником, ни моим боляром на дом, святеи Софеи и святого Ивана; а дом святей Софеи владыкам строить с сотчкыми; а старостам и торговцам, докладывая владыкы или кто будеть нашего рода князей в Новегороде, строити дом святого Ивана . А се приказываю своим наместником и тиуном: суда церковнаго не обидети, ни судити без владычня наместника. А се дах во олтарь святей Софеи и причту церковному всьденьник сенаник венци ; что суды церковныя, то святей Софеи; а кто нашего роду пограбить , или отъиметь, того повелехом владыци собором в синаници проклинати.
А се суды церковныя: распускы, смилное, заставание, умычка, пошибалное промежы мужем и женою о животе ; в племени или в сватовъстве поймутся, потворы и чародеяния, вълхвование, ведьство, зелейницъство, зубояжа, урекания три: бляднею, зелия, еретичьство ; отца или мати бьеть сын или дщи, или сноха свекров; братия или дети тяжутся о задници; церковная татба; мертвечи съвлачають, крест посекають, или на стенах рвжуть , или два мужа имутъся бита, единаго жена иметь за лоно другаго, раздавить; или кого застануть с четвероногою, или кто молится под овином, или в рощении, или у воды, или девка детя поврьжет, скот или псы или поткы или ино что неподобно церкви подеють; а тыи суды вси церкви даны суть и епископу; а князю, и боляром и судиям в тыя суды не въступатися. А то дал есмь по пръвых царей уряжению, и вселеньскых святых седми соборов великых святых. А по сем не въступатися детем моим, ни внучатам моим, ни всему роду моему до века в люди церковныя, ни в вси суды их. Аже кто пиобидить нашь устав, таковым не прощеным быти от закона Божия и горе себе наследують, и вечная мука ждеть их.
О всех сих, что предписано, дръжах за своими бояры, аже они обидять гостей , а где живуть, тым наровять, и княжу душу топять; аз въсмотрех в Фотея, патриарха цареградьскааго в грамоты, что принесл на Русь князь великый Владимир, нареченный в святом крещении Василий, сын Святославль, а внук Игорев и преблаженныа княгини прабабы Олгы, аже стоить в грамоте: торговыа вся весы, мерила и скалвы вощаныя, и пуд медовый, и гривенка рублеваа и всякая известь , иже на торгу промежу людми, от Бога тако искони уставлено есть епископу блюсти без пакости, ни умаливати, ни умноживати, и на всякий год извешивати. А скривится, а кому приказано, того казнить блиско смерти; а живот его на трое: треть живота святей Софеи, а другая треть святому Ивану, а третьяя треть сотчкым и Новугороду. А епископу, не управив того, за все то дати ему слово в день великаго суда. А печаловатися ему о том управлении, якоже и о душах человеческих. Аще же управить епископ сия управления наша, блажен будет и небесному царствию наследник будеть; а не урядить, а мы тое с своей души сводим.
А се церковныа люди: игумен, игуменьа, поп, диакон, и дети их; а кто в крылосе: попадья, чернец, черница, проскурница, паломник , свещегас, стороник, слепець, хромець, вдовица, пущеник, задушный человек , изгои трои : попов сын грамоте не умееть, холоп ис холопьства выкупится, купець одолжаеть; а се и четвертое изгойство и сего приложим: аще князь осиротееть ; монастыреве, болници, гостинници, странноприимници, то люди церковныа, богаделные; или митрополит, или епископ, — тыи ведають между ими суд или обиду, или кому прикажуть, или которого задница, или будеть иному человеку с тыми людми речь (или) обчий суд; своим тиуном приказываю суда церковнаго не обидети; а с суду давати девять частей князю, а десятую святей Софеи за княжую душу. А кто приобидить суды церковныа, платити ему собою, пред Богом отвещати на страшнем суде пред тмами ангел, идеже кргождо дела не сокрыются, благая же и злая, идеже не поможет никтоже никомуже; н токмо правда избавить от вторыя смерти и от вечныа муки, и от огня негасимаго, якоже есмы управиле по святых отец правилом, и по пръвых и благоверных царей и князей уряжению. А кто иметь преступати сия правила: или дети мои, или внучата, или правнучата, или в коем городе наместник, или тиун, или судия, или кто пообидить суды церковныя, да будуть провляти в сий век и в будущей седмию соборы святых отец вселеньскыих. А тая вся дела приказах святей Софеи и всему Новугороду моим мужам 18-ти сочкым, и вы сами за то ответ дадите в день страшнаго суда пред лицем Царя славы. Аминь.
А се правило собора никейскаго, cия изысках: у третьей жене и четвертой детем прелюодейна часть в животе : аще будеть доволен в животе, ино дасть дтем третьей жены и четвертой по уроку, занеже те и от закона отлучени суть; a cия случаються человеку по грехом, еже есть их обдержить немощь, занеже суть прелюбодейнеи, а не Богом благословение. И аз cия сам ведих пред собою и управих заповедми, но преданию святых отец, тяжю промежу первою женою детей со третьею женою и с детми, К со четвертою женою и с детми , яже есть из велика живота дати урочная часть по оскуду , а из мала живота, како робичичю часть по указу: конь, да доспех и покрут, по разсмотрению живота. А се от тогоже правила: иже есть останутся сынове и дщери у коегождо человека: братии со сестрами равная часть от всего имения ; иже ли сестра девою блуд сътворить, а истыи сведители обличають, — таковая да не възметь у братии от имения отечьскаго части; или братия, имения ради, лжу составять на сестру, а будет познано дело их лжа, таковый по закону камением да побиен будеть. — А то все приказах епископу управливати, а смотря в манаканум; а мы cие с своей души сводим.