Уставная грамота Василия Дмитриевича жителям Двинской земли

Уставная грамота великого князя Василия Димитриевича, данная жителям Двинской земли в 1397 году .
Се яз князь велики Василей Дмитриевичь всея Руси, пожаловал есмь бояр своих Двинских, также сотского, и всех своих черных людей Двинские Земли . Коли кого пожалую своих бояр, пошлю наместником к ним в Двинскую Землю, или кого пожалую наместничеством из двинских бояр, и мои наместники ходит по сей по моей грамоте великого князя .
Оже учинится вира, где кого утепут, и не душегубца изыщут: а не найдут душегубца, и не дадут наместником десять рублев , а за кровавую рану тридцать бел, а за синюю рану пятнадцать бел, а вина противу того .
2. А кто кого излает боярина, или до крови ударит, или на нем синевы будут, и наместницы судят ему по его отечеству безщестие; також и слузе .
3. А учинится бой в пиру, а возмут прощение не выйдя из пиру, и наместником и дворяном не взяти ничего ; а вышед из пиру возмут прощение, и не наместником дадут по кунице шерьстью.
4. А друг у друга межу переорет, или перекосить на одином поле, вины боран, а межы сел межа тридцать бел, а княжа межа три сороки бел, а вязбы в том нет .
5. А кто у кого что познает татебное, и он с себя сведет до десяти изводов; нолны до чеклого татя, и от того наместником и дворяном не взяти ничего, а татя впервые продати противу поличного ; а въдругие уличат, продадут его не жалуя ; а уличат вътретьие, ино повесити; а татя всякого пятнити .
6. А самосуда четыре рубли: а самосуд то: кто изымав татя с поличным да отпустит, а собе посул возмет, а наместники доведаются по заповеди, ино то самосуд, а опрочь того самосуда нет .
7. А кого утяжут в рубле, и наместником вины полтина; а того боле или менши, ино по томуж .
8. А на Орлеце дворяном хоженого белка; а езды и позовы Орлеца до Матигор две белки, езду до Колмогор две белки, до Куръострова две белки, до Чюхчелема две белки, до Ухтъострова две белки, до Кургии две белки, до Княжа острова четыре белки, до Лисича острова семь бел, а до Конечных дворов десять бел, до Нонаксы двадцать бел, до Уны тридцать бел; а с Орлеца вверх по Двине до Кривого белка, до Ракулы две белки, до Наволока три белки, до Челмахты четыре белки, до Емци пять бел, до Калеи десять бел, до Кириегор семнадцать бел, до Тоймы до Нижние тридцать бел; а на правду вдвое. А железного четыре белки, толко человека скуют, а не будеть по нем поруки, а боле того дворянину не взяти ничего; а через поруку не ковати; а посула в железех не просити; а что в железех посул, то не в посул .
9. А кто на кого челом бъет, дворяне и подвойские позовут к суду, а он не станет у суда, и на того наместници дадут грамоту правую безсудную; а кто будет не тутошней человек, и не его дадут на поруце .
10. А от печати наместником по три белки; а дьяком от писма от судные грамоты две белки ; а сотскому и подвойскому пошлинка с лодьи по пузу ржи у гостя .
11. А кто осподарь огрешится, ударит своего холопа или робу, и случится смерть, в том наместници не судят, ни вины не емлют .
12. А приставом моим Великого Князя в Двинскую Землю не въездити, всему управу чинят мои наместници .
13. А над кем учинят продажу силно, а ударят ми на них челом, и мне Князю Великому велети наместнику стати перед собою на срок; а не станет, ино на того грамота безсудная и пристав мой доправит .
14. А гостю Двинскому гостити в лодьях, или на возех: с лодии на Устюзе наместником два пуза соли, а с воза две белки, а того боле наместники не емлют у них, ни пошлинники ничего; а на Вологде дадут с лодии два пуза соли, а с воза по белке, а того боле не емлют у них ничего; а в лодиях, или на возех коли поедуть, и наместници Устюжские и Вологодские их не уимают .
15. А на Устюзе, и на Вологде, и на Костроме их не судят, ни на поруки их не дают ни в чем: а учинится татба от Двинских людей с поличным, и не поставят их с поличным передо мною перед Великим Князем, и яз сам тому учиню исправу; а чего кто иметь искати на них, и не учинят им срок перед моих наместников перед Двинских, и не учинят исправу им на Двине.
16. А куды поедут Двиняне торговати, ино им не надобе во всей моей отчине в Великом Княжении тамга , ни мыт, ни костки ни гостиное , ни явка , ни иные ни которые пошлины. А через сю мою грамоту кто их чем изобидит, или кто не имет ходити по сей грамоте, быти тому от мене от Великого Князя в казни.