Уставная грамота новгородского князя Всеволода Мстиславовича

Уставная грамота Новгородского князя Всеволода Мстиславича, данная церкви св. Иоанна Предтечи на Опоках (ок. 1135 г.)
Се аз князь великий Гаврил, нареченныи Всеволод, самодръжець Мьстиславичь, внукк Володимирь, владычествующю ми всею Рускою землею и всею областью Новгороцкою, Божиим благоволением поставил есми церков святыи великыи Иван на Петрятине дворище ; и устроил есми ю иконами многоценнами, и евангелием многоценным, и всеми книгами исполнь, устроил есми попы и дьяконы в сборной великой церкви. И даю святому великому Ивану, от своего великоимения, на строение церкви и в векы, вес вощаной , а в Торжку пуд вощаной, половина святому Спасу, а половила святому великому Ивану на Петрятино дворище; а оброка попом, и дьякону, и дьяку, и сторожам из весу вощаного имати: попом по осми гривен серебра, а дьякону четыре гривны серебра, а дьяку три гривны серебра, а сторожам три гривны серебра; а имати им той оброк и в векы, на всякий год, по моему данью великого князя Всеволода. А попом пети у святаго Ивана вседенная, у святаго Захарьи на полатех пети по неделям, и в векы; а дьякону пети у святаго Ивана субота да неделя, из того оброка, и в век. И яз князь великий Всеволод поставил есми святому Ивану три старосты от житьих людей, и от черных тысяцкого , а от купцев два старосты, управливати им всякие дела Иванская, и торговая, и гостинная, и суд торговый; Мирославу посаднику в то не вступатца, и иным посадником, в Иваньское нивъчтоже, ни бояром Новгороцкым . А кто хочет в купечество вложиться в Иванское, даст купьцем пошлым вкладу пятдесят гривен серебра, а тысяцкому сукно Ипьское , ино купцам положить в святыи Иван полътретьядцать гривен серебра; а не вложится кто в купечество, не даст пятдесят гривен серебра, ино то не пошлый купец, а пошлым купцем ити им отчиною и вкладом . А весити им в притворе святаго Ивана, где дано, ту его и дръжати; а весити старостам Иваньским, двема купцем пошьлым , добрым людем, а не пошлым купцем старощениа не дръжати, ни весу им не весити Иваньского. А у гостя им имати: у Низовского от дву берковска вощаных полъгривне серебра да гривенка перцю, у Полоцкого и у Смоленьского по две гривны кун от берковъска вощаного, у Новоторжанина полторы гривны от берковьска вощаного , у Новгородца шесть мордок от берковска вощаного. А куны им класти святаго великаго Ивана в дом, что вывесят, по правому слову; а Новгородцю не весити ни на которого гостя . А по моем животе великого князя Всеволода, стояти за дом святаго великаго Ивана брату моему великому князю всея Русии, и владыце Новгороцкому, и старостам купецьким и купцам, и за вся церковникы святаго Ивана; а взять князю великому из весу вощаного полътретьядцать гривен серебра чрез год. А праздник Рожество святаго великого Ивана почесть створити и праздновати старостам купецким и купцам , а имати старостам купецким и купцем из весу из вощаного на полътретьядцать гривен серебра, на всякый праздник святаго Ивана и в век, и старостам купецким святаго великого Ивана ставити на праздник святаго Ивана семъдесят свечь, и темъян и ладан. А пети в праздник владыце, а старостам купецким и купцам дати владыце гривна серебра да сукно Иньское; а на завтрее нети аихимандриту святаго Егоргиа , а взять ему полгривне серебра; а на третей день пети игумену святей Богородици из Онътонова манастыря, взять ему полгривне серебра . И яз князь великий Всеволод дал есми пошлины попам святаго великого Ивана Петрятино дворище с купець в Руси, на память князем великым дедом моим и прадедом, имати с купець тая старина и в векы: с Тверского гостя, и с Новгородцкого, и с Бежицкого; и с Деревьского, и с всего Помостья . А буевище Петрятино дворище от прежних дверей святаго великого Ивана до погреба, от погреба до Концаньского мосту; а того буевища имати куны старостам Иваньским и старостам Побереским, а класти куны в дом святаго великого Ивана. А попов святаго великого Ивана, и дьякона и дьяка, и сторожов призирати старостам Иваньским, и купцам и старостам Побереским и Побережаном. А в дому святаго Ивана не дръжати никому ничегоже, но развее свечи и темъяна. А городу, ни владыце, ни боярам весу не отъимати у святаго великого Ивана, ни продавати моего данья великого князя Всеволода; а кто почнет вве отъимати, или продавати, или дом обидити святаго великого Ивана и святаго Захарьи, на того Спас и Пречистая и святыи великыи Иван, будет им тма, и съблазнь, и казнь Божия .