Соборный приговор об отмене тарханов 20 июля 1584 года

СОБОРНЫЙ ПРИГОВОР ОБ ОТМЕНЕ ТАРХАНОВ 20 ИЮЛЯ 1584 ГОДА
< …> По благословенью отца своего, великий государь, благочестивый царь и великий князь Феодор Ивановичь, всеа Русин самодержец, взем скифетр Росийскаго царствия, советоваху с отцом своим и богомольцом, с преосвященным Деонисьем митрополитом, и со всем освященным собором, и со всеми бояры и со всем синклитом: како совокупишася на христьяны туркове, и агаряне, и литовской король, и все области немецкие, и распыхахуся дивиим образом, гордостию дмящеся, хотяху потребити православие.
И мы сих ради со благочестивым царем нашим поболехом зелне, и многая попеченья о сем благочестивый же царь наш Феодор Иванович всеа Русии с своими бояры и со всем своим синклитом сотвори, якоже довлеет его царской власти; в сих же и в нас внесена быша некая, яко возложенная, яже по священным епископиям и по святым монастырем в пустошь изнуряютца ради пьянственаго и непотребнаго слабого жития многообразие, многая жив запустения приидоша; и якоже убо по монастырем сия запустеваху, а х тому от мирских живущее прилагаху, не токможь по благословней вине, но и с ухищрением и тяжею, и прибытка никоего ж несть, но развее токмо по монастырем в пустошь изнуряетца на пьянственныя и на иные проторы, яже не токмо иноком, но и мирским свыше потребы не подобает творити; и сия убо по монастырем в пустошь изнуряхуся паче потребы, а воинственому чину от сего оскудение приходит велие.
И преж убо о сем, блаженные памяти при благочестивом царе и великом князе Иване Васильевиче, а во иноцех Ионе, и сыне его, блаженные памяти царевиче князе Иване, и при освященном Антоние митрополите всеа Русии, и всего освященнаго собора и всего царского синклита, уложена быша сице, и на утверждение грамоту написавше, утвердиша в лете семь тысящь восмьдесят осмаго году, генваря в пятыйнадесять день: что с того году и с того дни митрополиту, и архиепископом, и владыкам, и монастырем вотчин не покупати, и по душе ни по ком вотчин в монастыри не имати, для воинского оскуденья, что воинство велие прииде во оскудение; и тое бы грамоту переписати и укрепити по тому ж.
Другое ж и о том советоваху и утвердихом с повелением благочестиваго царя и великого князя Феодора Ивановича всеа Русии, смиренный Деонисей митрополит со всем освященным собором и со всем царским синклитом, о тарханех, чтоб вперед тарханом не быти; что земли митрополичи, и архиепископ ли, и владычни, и монастырские в тарханех, и с тех никакие царские дани и земских розметов не платят, а воинство служилые люди те их земли оплачивают; и сего ради многое запустение за воинскими людми в вотчинах их и в поместьях, платячи за тарханы; а крестьяне, вышед изза служилых людей, живут за тарханы во лготе, и от того великая тощета воинским людем прииде.
И сего ради, для великих нуж и тощеты воинским людем, по совету благочестиваго царя и великого князя Феодора Ивановича всеа Русии, мы преосвященный Деонисей митрополит всеа Русии, и со всем освященным собором, и со всеми бояры и со всем царским синклитом, уложихом сице: да церкви Божия и священныя места без мятежа будут, а воинской чин на брань противу врагов креста Христова ополчатца крепце, и сице устроихом и утвердихом по тому ж, как отец его, государь блаженные памяти царь и великий князь Иван Васильевич всеа Русии, и сын его, блаженные памяти царевич князь Иван Иванович, утвердили прежнюю грамоту: елико есть земель и земляных угодей, и елико недвижных вещей, еже есть села и деревни, и пожни, и сеножати, что до сего данная, с лета семь тысящь восмьдесят осмаго, генваря месяца пятогонадесять дня, и возложенная Богови в митрополие, и в епископиях, и по монастырем, да ничтоже претворяетца, и из митропольи, и из епископьи и из монастырей не исходит, и вотчины никоторым судом ни тяжею у митрополита, и у владык, и у монастыря с того лета не емлют и не выкупают; хоти которые место и не утвержено крепостьми, и у того монастыря не выкупить; и вперед с манастыри о вотчинах не тягатися, а в монастыри вотчин не давати.
Так же от сего году, лета семь тысящь девятьдесять третьяго, месяца сентября перваго числа, на время, до государева царева и великого князя Феодора Ивановича всеа Русии указу, для воинского чину и оскуденья, тарханы оставити, покаместа земля поустроитца, и помочь во всем учинитца царским осмотрением; а платить тарханом всякие царские подати и земские розметы всяким тарханом от священных, и боярским и княженецким, со всеми людми ровно всей земле, как тарханом, так и всяким служилым людем, и тамга тарханом и всяким людем в то время до государева указу платить, хто ни почнет торговать, чтоб воинство конечне во оскудение от того не было, для ради тое вины и государеве казне в том убытка не было.
И вотчинником вотчин своих вперед, по прежней грамоте и по нынешней, по душам не давати, а давати за них в монастыри денги, которое село чево стоит, а село имать вотчинником; а будет у кого роду не будет ближнего, и та вотчина имати на государя, а денги за нее платити ис казны, чтоб в службу служилым людем земли прибавливати.
А митрополиту, и владыкам, и монастырем земель не покупати, и закладнеи не держати.
А хто после сего уложенья купит землю в которой монастырь, или закладня учнет за собою которой монастырь держати, и те земли имати на государя безденежно; а которые ныне закладни за митрополитом, и за владыками, и за монастыри, и те земли поимати на государя; а в деньгах ведает Бог да государь, как своих богомолцов пожалует.
А вперед княженецких вотчин в монастыри не имати; а хто возмет без государского ведома, и те вотчины взяти на государя безденежно.
А которые монастыри покупили княженецкие вотчины, и те вотчины взяти на государя; а в денгах ведает Бог да государь, как своих богомолцов пожалует.
А вперед митрополиту, и владыкам, и монастырем земель не прибавливати никоторыми делы; жити им на тех землех, что ныне за ними, с того лета, как приговор был преж сего, и ныне с лета семь тысящь восмьдесять осмаго, генваря месяца пятогонадесять дня.
А всякие царские дани платить всяким тарханом от священных и от бояр и от князей с служилыми людми ровно до государеву указу; и в закладчикех за собою торговых людей, с которых идет царские дани, как от священных, так от мирских царского синклита, не держати.
А которое место убогое, земли будет мало, или не будет, и он бьет челом государю, и государь с митрополитом соборне и з бояры приговоря, и устроят тот монастырь землею, как будет пригоже, как бы ему мочно прожити.
А на большое утверждение царь и великий князь Феодор Иавнович всеа Русии к сей грамоте печать свою приложил; а митрополит Деонисей всеа Русии к сей грамоте печать свою привесил, и руку свою подписал; а архиепископы и епископы печати свои привесили, и руки свои подписали; а архимариты, и игумены, и старцы руки свои приложили.
Утверждена бысть сия грамота в преименитом и царствующем граде Москве, лета 7092 году, месяца июля в 20 день.