Повесть о походе Ивана IV на Новгород в 1570 году

ПОВЕСТЬ О ПОХОДЕ ИВАНА IV НА НОВГОРОД В 1570 ГОДУ
В лето 7078-го году , генваря во 2 день, благочестивый государь царь и великий князь Иван Васильевичь всеа Росии самодержец, ходил со гневом на Великий Новоград и на архиепископа Пимена, и на его владычных бояр, и на изящных именитых людей, и на всех градцких жителей. < …>
Благочестивый государь царь и великий князь Иван Васильевичь, всеа Росии самодержец посла в Великий Новоград наперед перед собою, изгоном, предний полк своих государевых бояр… и всяких воинских людей велие и безчисленое множество. Они же приехаша… около Великого Новограда учиниша великия сторожы и крепкия заставы со всяцем утвержением. И повелеша на заставах стражем крепко стрещи всех живущих во граде, кабы ни един человек из града не убежал. А иные государевы князи и дети боярские того же государева перваго полку разъехашася по всем монастырем, иже есть около Великого Новограда, и монастыри запечаташа и церковные казны, а игуменов и черных священников, и дияконов, и соборных старцов изо всех новогородцких монастырей собраша и привезоша с собою в Великий Новоград, числом их яко до пятисот. < …>
И того же 7078-го лета, генваря в 6 день …приехал в Великий Новоград благочестивый государь царь и великий князь Иван Васильевичь, всеа Росии самодержец, а с ним сын его государев, благоверный царевич князь Иван Ивнович, и с ним, государем, многое безчисленное множество полков, князей и бояр, и детей боярских… да с ним з государем, полторы тысящи стрельцов… А назавтрия… благочестивый государь царь и великий князь Иван Васильевичь, всеа Росии самодержец, повелеигуменов и попов черных, и дияконов, и старцов соборных, да которые прежде государева приезду в первом полку иманы из монастырей и поставлены на правежы, повеле избивати их на правежи палицами насмерть, и, убив их всех, повеле когождо их в свой монастырь развозити и погребати. А в воскресение Господне, генваря 8, государь поехал … к …церкви ко Премудрости Божия Софеи… и стретил его, государя …архиепископ Пимин… И говорит царь и великий князь архиепископу Пимину: «Ты, злочестиве, в руце своей держиши не крест животворящий, но вместо креста оружие, и сим бо оружием хощеш уязвити царьское сердце наше своим неистовым зломыслением и с своими злотворцы и единомысленники, града сего жители. И хощете… Новоград предати сопостатом нашим, иноплеменником, королю литовскому Жигимонту Августу. И отселе впереди не си убо наречешися пастырь и учитель и сопрестольник великия соборныя церкви Премудрости Божия Софеи, но волк, и хищник, и губитель, и изменник, и нашему царьскому багру досадитель»…Повеле государь архиепископову казну и весь двор его владычень, со всеми обиходы и все полаты и келий пограбити, и бояр его владычних и всех слуг его повеле переимати и за приставы отдавати до своего государева указу. А самого …Пимина ограбить повеле, за приставы его отдати и крепко повеле его стрещи… а дворецкому своему, Лву Андреевичу Салтыкову и протопопу Евстафию и прочим боляром повеле государь идти в …церковь Премудрость Божия Софию, взяти повеле ризную казну, и прочая драгия освященныя церковные вещи, и святыя иконы чюдотворныя… Прочее же повелевает им государь по всему Великому Новуграду, во всех святых Божиих церквах, имати церковныя казны, и святыя честныя божественныя драгия чюдотворныя иконы, и ризы, и колокола.
Таже благоверный государь царь и великий князь Иван Васильевич, всеа Руси самодержец, и с сыном своим со благоверным царевичем князем Иваном Ивановичем седе на судище, иде же государь приехал, стал на Городищи. И повеле государь приводити из Великого Новаграда владычных боляр и иных многих служивых людей, и детей боярских , и гостей , и всяких градцких и именитых изрядных людей, и жен их и детей пред себя, и повеле государь их пред собою горце и люте и безчеловечне различными муками мучити. И во мнозех неисповедимых, горких и различных муках повеле государь телеса их некоею составною мудростию огненою поджигати, иже именуемаго подъжаром, и своим государевым детем боярским повелевает государь тех мученых и поджареных людей за руки и за ноги и за власы опако вязати различно тонкими ужыщи, и привязывати их повеле по человеку с каменем и повеле их быстро за санми влеши на Великий Волховский мост и метати с мосту в реку Волхов. А жен их, мужеск и женеск пол младенцы, и сущий млеком питаемии, и всяк возраст повеле государь привозити их на Великий Волховский мост и возводити их на высоту. Иже ту устроено место, и вязаху за руце и за нозе опако назад, младенцов к матерем своим и вязаху, и с великиия высоты повеле государь метати их в воду, в Волхов. А иные в те поры государевы люди, и дети боярские, и воинские люди вмалых судех ездяху по реце Волхове, со оружием, и с рогатыни, и с копии, и з багры, и с топоры, и которые люди, мужы и жены и всяк возраст, из глубины речной и вверх на воду спловет, и они прихватывают багры, и тех людей копии и рагатынями прободающи, и топоры секуще и во глубину речную без милости сурово погружающе, предаяху их горцей смерти. И бысть убо таковаго неизповедимаго кровопролития человеческому роду, грех ради наших, неукротима ярость царева по вся дни, безпрестани, яко до пяти седмиц и болши, и на всяк убо день ввергнут и потопят в воде человек всякаго возраста числом яко до тысящы, а иногда и до полу торы тысящ. А тот убо день облегчен и благодарен, иже ввергнут в воду до пятисот или до шестисот. И по скончании убо того благоверный государь царь и великий князь Иван Васильевичь всеа Росии самодержец, с своими государевы людми… начат ездити около Великого Новаграда по честным и великим монастырем, и тамо повеле в монастырех грабити церковныя и монастырские казны, и кельи, и служебныя монастырьские домы, и всякие обиходы, в житницах хлеб всякой, стоячей в скирдах и на полях немолоченой хлеб повеле огнем сожигати. А скот их всякой, и лошади и коровы, повеле посекати. И по сих благоверный государь царь Иван Васильевичь всеа Росии самодержец, приехал из монастырей в Великий Новоград, и повеле по всему Новуграду, по всем торговым рядам, и по всем улицам, и в ленивых торжках, у градских торговых людей и в лавках всякой товар грабити, и торговые анбары и лавки повеле разсекати и до основания разсыпати. И потом государь благоверный царь и великий князь со всеми своими людми и со всеми воинскими полки начат ездити по всему Новуграду и по всем посадом, и повеле государь у всех градских жителей во всех домех их имения грабити, а самих людей и жен их, безпощадно, без останков, всех грабити, и дворы их, и хоромы ломати, а окна и ворота вскоре повеле без милости высекати. А в те поры государь, во время градскаго грабежу, иных государевых своих людей разсылает около Великого Новаграда на все четыре стороны, на всякую новгородцкую пятину, по станом и волостям и по усадищем боярским и по поместьям, и по всем местом около Великого Новаграда верст за двести и за полтретьяста и болши, и повеле домы их всячески разхищати и скоты убивати у всяких людей, без пощаденья, чей кто не буди, без разсуждения. И бысть убо того неисповедимаго колебания и великаго падения, труса и кровопролития человеческому роду в Великом Новеграде и по окрестных странах около Великого Новаграда безпрестани шесть недель, грех ради наших. И того же 78го года, месяца февраля в 3 день… повеле государь оставших новгородцов жителей изо всякой улицы по лутчему человеку поставити пред собя. Они же сташа пред царем с трепетом, дряхли и унылы, отчаяшеся живота своего, быша яко мертви, видяще неукротимую ярость цареву. И благочестивый и христолюбивый государь князь Иван Васильевичь, всеа Росии самодержец, возрев на них милостивым и кротким оком, издаст им государь царьское милостиво слово и сказа им сице: «Мужие, жителие сего Великого Новаграда!… Молите всемилостиваго и всещедраго человеколюбиваго Господа Бога и Пречистую Его Богоматерь… и всех святых Его о нашем благочестивом царьском державстве, и о чадех моих…, о Иване, о Федоре, и о всем нашем христолюбивом воинстве, чтобы нам Господь Бог подаровал свыше победу и одоление на вся видимыя и невидимыя враги наша и супостаты…». И сия глаголы изрече и отпусти их с миром во своя домы. А владыку Новгородцкаго архиепископа Пимина, и попов и дияконов, которые не искупилися от правежу, а прочих досталних новгородцов опалных людей повеле государь отсылати за приставы в Олександрову слободу, до своего царева приезду. И как государь приехал … в … Москву, и повеле со владыки новгородцкого Пимена сан сняти и в заточение послати в монастырь, он же тамо вскоре не по мнозе времени преставися благодарне, а прочих оставших новгородцов, опалних людей, повеле государь на Москве казнити смертною казнию, главы их отсекати. И тако тии ту скончашася. А иных мнозе испытани, повеле государь по иным городам разсылати на жителство. < …>