Начало книгопечатания в русском государстве
НАЧАЛО КНИГОПЕЧАТАНИЯ В РУССКОМ ГОСУДАРСТВЕ
Изволением отца и споспешением сына и совершением святого духа, повелением благочестиваго царя и великаго князя Ивана Васильевича, Всея Великия Росия самодержца, и благословением пресвященного Макария митрополита Всея Русии, многи святыя церкви воздвизаеми бываху, во царствующем граде Москве и по окрестным местом и по всем градом царства его, пачеже в новопросвещенном месте во граде Казани и в пределех его. И сия вси святыя храмы благоверный царе украшаше честными иконами и святыми книгами, и сосуды, и ризами, и прочими церковными вещми, по преданию и по правилом святых апостол и богоносных отец и по изложению благочестивых царей греческих во Царе граде царьствовавших великаго Константина и Устиниана, и Михаила и Феодоры, и прочих благочестивых царей в своя времена бывших. И тако благоверный царь и великии князь Ива^н Василиевич всея Русии повеле святыя книги на торжищих куповати и в святых церквах полагати псалтыри, и евангелия и апостолы, и прочая святыя книги. В них же мали обретошася потребни, прочий же вси растлени от преписующих ненаученых сущих и неискусных в разуме, ово же и неисправлением пишущих. И сие доиде и царю вслух; он же начат помышляти какобы изложите печатныя книги, яко же в Грекех и в Венецыи и во Фригии, и в прочих языцех, дабы впред святыя книги изложилися праведне. И тако возвещает мысль свою пресвященному Макарию, митрополиту всея Русии; святитель же слышав зело возрадовася, и богови благодарение воздав, царю глаголаше, яко от бога извещение приемшу, и свыше дар сходящ. И тако повелением благочестиваго царя и великаго князя Ивана Василиевича всея Русии и благословением преосвященного Макария митрополита начаша изыскивати мастерства печатных книг в лето 61 осмыя тысящи в 30-е лето государьства его . Благоверный же царь повеле устроити дом от своея царския казны идеже печатному делу стройтеся, и нещадно даяше от своих царских сокровищ делателем Николы чюдотворца Гостуннского диякону Ивану Федорову да Петру Тимофееву Мстиславцу на составление печатному делу и к их упокоению дондеже и на совершение дело их изыде. И первее начаша печататися святыя книги деяния апостольска и послания соборная и святаго апостола Павла послания в лето 770 первое априля в 14 на память преподобного отца Ивана Палеврета, сиречь ветхия лавры, совершени же быша в лето 770 второе марта в первый день при архиепископе Афанасие митрополите всея Росия в первое лето святительства его в славу всемогущия и живоначальныя Троица отца и сына и святого духа. Аминь.
