Построение Успенского Собора

ПОСТРОЕНИЕ УСПЕНСКОГО СОБОРА
В лето 6983 . Послал князь велики посла своего Семена Толбузина во град Венецию, к тамошнему их князю, извет кладучи таков, что посла его Тривизана отпустил со многою приправою, а сребра пошло, рече, семь сот рублев; повеле и мастера пытати церковнаго. Он же тамо быв и честь прия велику и сребро взя, а мастера избра Аристотеля. Многи, рече, у них мастери, но ни един избрася на Русь; той же восхоте, и рядися с ним по десяти рублев на месяць давати ему. И хитрости ради его Аристотелем зваху его, рече Семион: да сказывают еще и Турьской деи царь звал его, что во Цареграде сидит, того ради; а там церковь сказывал в Венеции святаго Марка велми чюдну и хорошу, да и ворота Венецийскии деланы, сказывает, его же дела, велми хитры и хороши. Да и еще деи хитрость ему казал свою такову: понял деи его к себе на дом, дом деи добр у него и полаты есть, да велел де блюдо взяти, блюдо же деи медяно, да на четырех яблоках медяных, да судно на нем яко умывалница, якоже оловяничным делом, да нача лити из него из одного воду, и вино, и мед, его же хотяше то будет…
Взят же с собою тот Аристотель сына своего, Андреем зовут, да паробка, Петрушею зовут, поиде с послом с Семеном Толбузиным на Русь; пречистые храма похвали гладость, да известь не клеевита да камень не тверд; того ради плитою все своды дела, якоже тверже камени, рече; и не восхоте приделывати северной стены и полати, но изнова зача делати. Ту же церковь разби сицевым образом: три древа поставя и конци их верхние совокупив во едино, и брус дубов обесив на ужищи посреди их поперек и конець его обручем железным скова, и раскачиваючи разби; а иные стены съисподи подобра и поление подставляя и всю на поление постави, и зазже поление и стены падошася – и чюдно видети, еже три годы делали, во єдину неделю и менши развали, еже не поспеваху износити камения; а в три дни, рече, хотяше, развалити. Книжницы же называху брус дубовой бараном; се же, рече, написано, яко сицевым образом Тит Ерусалим разби. Рвы же изнова повеле копати и колие дубовое бити. Езди же в Володимерь и смотрив пречистые похвали дело; рече: «некиих наших мастеров дело». И кирпичную печь доспе за Ондроньевым монастырем, в Калитникове, в чем ожигати, и как делати, нашего Рускаго кирпича уже да продолговатее и тверже, егда его ломать, тогда в воду размачивают; известь же густо мотыками повеле мешати, и яко натурие же засохнет, то ножем не мочи росколупити… Обложи же церковь продолговату полатным образом…
На первое лето изйеде ея из земли Аристотель. Известь же как тесто густое растворяше, а мазаша лопатками железными; а камень ровной внутри класти повеле; столпы же едины 4 обложи круглы: се, рече, крепко стоят, а в олтаре два столпа кирпичны, те на четыре углы; а все в кружало да в правило …
Того же лета Аристотель пречистые храма по кивоты , еже около ея, сътвори; внутри же стен всуцепы железные положи яко правила на вретенех , и межю столпов, идеже брусие дубовое в наших церквах, то все железно сковав положи…
Того же лета Аристотель колесо сътвори, и вверх камение не ношаше, но ужищем цепляше и възвлекаиіе, и Верху цепЛяше Малые колесца, еже плотники векшею зовут, еже ими на избу землю волочат – и чюдно видети; на столпы же по 4 камени велики положи, и съвокупив кружало и истеса на них по 4 концы на четырех странах, едино против другаго – и мнети кому, яко на каменых деревьях насквозь каменье то сбито…
Того же лета свершена бысть церкви каменая святая богородица. Сътвори же у ней Аристотель верхи четыре, около шеи болшие казну сътвори: полати же подле олтарь от сторонних дверей учини, и на верх церкви въсходити лествицу учини; своды же в один кирпичь сътвори и сведе, того ради, егда дождь идет ино каплет. На пятое лето сверши ея. Помост же мелким каменем измости; в олтаре же, над митрополичим местом, крыжь лятский истеса на камени за престолом, его же митрополит последи стесати повеле: перед предними дверми помост накры каменем, и в один кирпичь сведе, и середку на гире повеси железной…