Жалованная грамота Великого Новгорода сиротам Терпилова погоста

ЖАЛОВАННАЯ ГРАМОТА ВЕЛИКОГО НОВГОРОДА СИРОТАМ ТЕРПИЛОВА ПОГОСТА, УСТАНАВЛИВАЮЩАЯ ИХ ПОВИННОСТИ
Господину посаднику новгородцкому Василью Микитину, тысяцкому новгородцкому Овраму Степановичю и всему господину Великому Новугороду на веце , на Ярославле дворе , се били челом Степан Есиповичь и его братья Андреян Олександровичь и Ермола Левонтиевичь и Остафей Васильевичь, что они емлют у наших сирот на Терпилове погосте поралье посаднице и тысяцкого не по старине. И посадник и тысяцкой и весь господине Великий Новгород даша грамоту жаловалную, на веце на Ярославле дворе, сиротам Терпилова погоста : давати им поралье посадници и тысяцкого по старым грамотам по сороку бел да по четыре сева муки, по десяти хлебов. А хто крестьянин Терпилова погоста в Двинскую слободу войдет, ино ему мирянину тянути в Двинскую слободу, а который двинянин слободчанин почнет жити на земле Терпилова погоста, а той потянет потугом в Терпилов погост. А цем владел Савелеи Григорьевичь и его братья землею и водою, и лесы, и полешими месты солоными в Унской губе и всякими ловищами, и им тем владети и детям их. А хто сю грамоту переступит, и даст Новугороду сто рублев.