Договорная грамота Великого Новгорода о мире в Яжелбицах

ДОГОВОРНАЯ ГРАМОТА ВЕЛИКОГО НОВГОРОДА О МИРЕ В ЯЖЕЛБИЦАХ
Грамота новгородская.
По благословению преосвященнаго архиепископа Великаго Новагорода и Пьскова владыки Еуфимиа, от посадника ноугородского Ивана Лукиничя, от тысетского ноугородского Василиа Пантеевичя, и от всего Великого Новагорода.
Се приехали послове к великому князю Василию Василиевичю всея Руси и к великому князю Ивану Василиевичю всея Руси от Великого Новагорода посадник ноугородскыи Григореи Даниловичь, посадник ноугородскыи Федор Яковличь, посадник ноугородскыи Василеи Степановичь, тысятскои ноугородскыи Яков Ивановичь, тысятскыи ноугородскыи Василеи Пантелеевичь, а от житьих Офонас Микуличь, Иван Юриевичь, Яков Ивановичь, Еремеи Кузмичь, Василеи Захарьиничь и докончали мир по крестным грамотам со князем с великим с Василием с Василиевичем и со князем великим Иваном Василиевичем.
Как целовал князь великыи Ондреи и князь великыи Иван , и князь великыи Семен , и прадед твои князь великыи Иван, и дед твои князь великыи Дмитрии, и отец твои князь великыи Василеи, целуй, господине князь великыи Василеи Василиевичь и князь великыи Иван Василиевичь, по тому же крест ко всему Великому Ноугороду. Новъгород держати вам в старине, по пошлине, без обиды; а нам, мужем ноу город цем, княжение ваше держати честно и грозно, без обиды. А пошлин ваших, князей великих, не таити, по целованию. А что волостей ноугородцких всех, вам не держати своими мужи, держати мужи ноугородцкими, и дар имати от тех волостей. А без посадника вам, князи, суда не судити, ни волостей роз давати, ни грамот давати. А что вам пошлина в Торжку и на Волоце: тиун свои держати на своей части, а ноу город цом на своей части. А в Бежыцах вам, князи великыи, ни вашим княгиням, ни вашим бояром, ни вашим слугам сел не держати, не купити, ни даром не приимати, по всей волости Ноугородцои.
А се вы волости ноугородцкие: Волок со всеми волостьми, Торжок, Бежици, Городець Палець, Шипино, Мелеца, Егна, Заволочье, Тирь, Пермь, Печера, Югра, Вологда. А в Русу вам, князи, ездити на третию зиму. А лете ездити на Взвад звери гонити. А в Ладогу вам слати осетреникы и медовары, по старым грамотам по крестным. А в Ладогу вам, князи, ездити на третие лето. А из Бежиць вам, князи, не вывод ити людей в свою волость, ни из ыных волостей ноу город цкых, ни грамот давати, ни закладнеи ни держати, ни приимати, ни вашим княгиням, ни вашим бояром, ни купчины. А без вины вам, князи, мужа волости не лишити, ни грамот не посужати. А пожни, князи, ваши и ваших мужей, то ваши и ваших мужей; а что пожни ноугородскыи, а то к Ноугороду, как пошло. А дворяном вашим, как пошло, погон имати: от князя по пяти кун, а от тиуна по две куны. А что мыть по Суз далекой земле в вашей волости: от воза имати по две векши, и от лодьи, и от хмелна короба, и ото лняна. А дворяном вашим у купцов повоза не имати, разве ратные вести. А слобод и сел, князи великий, съетупилися Великому Ноугороду; на Ноугородскои земле сел не ставити. А на
Имоволожском погосте куны имати. А холоп или роба иметь на господу вадити , тому вам веры не няти. Ни на Низу ноугородца не судити, ни дани роз давати, не приставов вам не высылати во всю волость Ноугородцкую, с Низу не всылати.
А что вам, князи великый, гнев на владыку, и на посадника, и на тысецкого, и на весь Новъгород, то вам, князи великий, нелюбие отложити. А хто вам почнет вадити, а тому веры не няти. А про послы и про купцы ноугородцкыи, тех вам не приимати. А в Немецком дворе торговати нашей братеи ноугородцем. А двора вам не затворяти, ни приставов не приставливати. А на том вам, князи великый, крьст целовати ко всему Великому Ноугороду. А гостем гостити без рубежа, по цесареве грамоте. А судей слати по волостем на Петров день, как пошло. А вывода межи Суздальской земли и Ноугородцкои не чинити. А закладнеи вам, князи великый, и вашим княгиням, ни вашим бояром в Торжку не держати, ни во всей волости Ноугородцкои: а купець пойдет во сто, а смерд потянет в свои потуг, как пошло, к Ноугороду.
А на том на всем, князь великый Василеи Василиевичь и князь великый Иван Василиевичь, целуйте крест ко всему Великому Ноугороду, безо всякого извета; тако же и посадник, и тысяцкыи, и весь Великой Новъгород, целуйте крест к великому князю Василию Василиевичю всея Руси, и к великому князю Ивану Василиевичу всея Руси, по любви в правду, безо всякой хитрости.