Грамота Великого Новгорода на «черный бор» Василию II
ГРАМОТА ВЕЛИКОГО НОВГОРОДА НА «ЧЕРНЫЙ БОР» ВАСИЛИЮ II
От посадника Великого Новагорода степенного Офонаса Остафьевичя , и от всех старых посадников, и от тысяцкого Великого Новагорода степенного Михаила Ондреевичя , и от всех старых тысяцких, и от бояр, и от житьих людей, и от купцов, и от черных людей, и от всего Великого Новагорода. На вече на Ярославле дворе. Се дахом черный бор на сеи год великому князю Василью Васильевичю всея Руси. А послал князь велики на черный бор Семена Яковличя в Торжок. А брати князя великого черноборцем на новоторжьских волостех на всех, куды пошло по старине, с сохи по гривне по новой, а писцу княжу мортка с сохи. А в соху два коня, а третьее припряжь ; да тшан кожевничскои за соху; невод за соху; лавка за соху; плуг за две сохи ; кузнець за соху; четыре пешци за соху; лодья за две сохи; црен за две сохи. А хто сидит на исполовьи , на том взяти за пол сохи. А где будет ноугородець заехал ладьею, или лавкою торгует, или староста, на том не взяти . А кто будет одерноватыи, емлет месячину а том не взяти. А кто, поверга свои двор, а вбежит в боярьскии двор, или кто имет соху таити, а изобличат, на том взяти вины въдвое за соху. А корм з десяти сох князя великого черноборцем взяти тритцать хлебцов, баран, а любо полоть мяса, трое куров, сито заспы, два сыра, бекар соли; а коневого корму пять коробеи овса в старую коробью, три воза сена з десяти сох, как пошло; по две подводы от стану до стану. А брати им, куды и переже сего черноборци брали, по старине .
