«Смердья брань» во Пскове 1485-1486 гг.

«СМЕРДЬЯ БРАНЬ» ВО ПСКОВЕ 1485–1486 ГГ.
В лето 6993 (1485). Месяца септевриа 5, бысть чюдо преславно: явися на небеси 3 месяца и стояху доволен час близ друг друга, в нощи, к недели пред заутрении. Сицевая знамения проявляет Бог, хотя навести казнь на согрешшая к нему, яко же и бысть: пред сими бо деньми Туркове преехавше море в многы кораблех, плениша землю Волыньскую, и взяша преже Келию град и по том Белгород , а живущая в них мужи и жены множество посекоша, и овых пожгоша; и не вемы, что срящеть ны по сих. Тоя же осени псковичи поставиша новый мост черезо Пьскову, а даша мастером 60 рублей, а платиша то серебро мясники. Тоя же зимы послаша псковичи к князю великому Ивану Васильевичю послы своя, Григорию посадника Яковлевича Кротова и Григорию Хрусталова и иных бояр с ними бити чолом, чтобы отдали своея нелюбкы, что казнили смердов; и он въсполевся веле смердов отпустити, а посадников откликати , и животы отпечатати, а князю Ярославу добити чолом: «И тогда начнете ми бити чолом, и яз великой князь о вашемь добре погадаю». Они же приехавше и псковичемь правиша свое посольство на вечи, по ответу князя великого; и псковичи, чорныи люди, тому веры не няша. И по том за неделю до Рождества Христова послаша иныа послы, 4 посадника, посадника Якова Ивановича, и Макарью Васильевича, и Дорофея, и 10 бояринов ис концов, добрых людий. Они же, ехавше, биша чолом князю великому, а смердов не отпустя, ни посадников не откликав, ни князю Ярославу не добив чолом. И князь великий изополевся на них, и на 3 день повеле своим бояром ответ дати, как первым послом. И тако, приехавше, правиша посольство на вечи, и чернии люди ни темь веры не яша, рекуще, зане же сии съгласишася по чолобитью посадников, котории збегли на Москву и норовят им. И оттоле начат быти брань и мятеж велик межю посадникы и бояры и житьими людьми, понеже сии вси въсхотеша правити слово князя великого, смердов отпустити, а посадников откликати, а мертвая грамота списанаа на них выкынути, а князю Ярославу добити чолом о печаловании, а блюдущеся от князя великого казни, что без его повелениа и пред послом князя великого смерда казнили и посадника Гаврила убили. И о том восхотеша и с князем Ярославом бити чоломь князю великому. А чернии люди молодии всего того не восхотеша, рекуще: «Мы о всемь том прави, и не погубит нас о том князь великыи, а вам веры не имемь, а князю Ярославу не за что нам чолом бити». И о том много думавше послаша от молодых людий, Перха с Полонища и с нимь Лакомцова сына з Запьсковья, к великому князю бити чолом: «Како нам осподарь укажешь, и мы всю твою волю створим о смердах и о посадниках; а по сем наши болшии послове будут, посадники и бояри, бити чолом тобе, осподарю своему». И тако з грамотою послаша их, в Великий пост, в пяток 3 недели, а все то на перечину посадникам и житьимь людямь, а не исправивши ничего же повеленаго князя великого слова. Тоя же зимы о свадбах приеде в Великий Новъгород от князя великого и от митрополита Геронтиа поставлен пресвященный архиепископь владыка Генадий, преже бывый архимандрит у Чюда архаггела Михаила на престол святого великого Софея паствити люди Божиа; а на масленой недели приела во Псков свою грамоту благословеную, и даде в дар псковичем турей рог окован златом да икону локотницю на злате.
Тоя же зимы князь великий Иван Васильевич разгневася на князя тферского Михаила Борисовича, что начат дружбу держати с литовскымь королемь Андреемь и съветы с ним творити о всем и испроси в короля за себе внуку. И того ради князь великий посла на него воеводы своя с множеством вой. И плениша всю землю их, и взяша 2 городаи сожгоша; и тако владыка тферский з бояры добиша чолом, и смиришася. Тоя же зимы в великое говение в Тферскои земли убиша дружину их и вметаша в
реку разбойники. И то слышавше, псковичи по Велице дни на 4 недели послаша к князю великому послы своа, посадника Ивана Агафоновича и посадника Микиту Ларивоновича и Зиновиа Сидоровича и Андреа Ивановича, и с ними бояр ис концов, и биша чолом князю великому Ивану Васильевичу. И он с великою опалкою отвещал, рекь: «Аже моя водчина слово мое исправит, и потомь начнете ми бити чолом о моей нечести, и яз буду вас жаловати по пригожаю». И по том псковичи слышавше посольство их и ответ князя великого, и въскоре отпустиша смердов, Стехна и Сырня и Лежня, и списаную грамоту мертвую на посадников из ларя выкинуша и животы и дворы отпечаташа. Буди же и се ведомо, яко сие лето в Псковской земли многым христианомь бысть велми притужно о хлебе, понеже с осени пал снег на талую землю, и по том быша мрази, а земля чрезо всю зиму бяше тала, и по мхамь и по болотом воды и грязи не померзли, и по удолом где по низкым местом под снегом подпрел корень ржаный. И егде бысть весна, по Велице дни с 3 недели бысть ведряно и солнечно и красно, и по том бысть студено и мокрослот с морозом, и померже вшедъшен ржаный хорень, и бысть черна земля и по том не бысть дождя и до Петрова заговеньа, а ярь сеяна в суху землю не начат усходити. И священноиноки, и священникы, и диакони, помолишася Богу, Святей Троици, с множеством народа идоша с кресты к Благовещению Святей Богородици, и егде начаша петь мольбен, внезаапу бысть гром и туча велиа с силною бурею и з дождем; и оттоле начаша дождеве мнози быти по местом. А по иным местом засуха велми бяше; и где быша дождеве умножи Бог ярового всякого обилья, а рожь инде събраша семяна ржаныя, а инде и с избытком, а инде и жати нечего, и засеяша старою рожью. И тогда купиша четвертку ржи по 7 и по 8 денег, а жита четвертка по 5 денег, а овса зобнича по 10 и 12 денег. Того же лета на Москве преставися в иночестве мати князя великого Ивана Васильевича, княгиня великаа Мариа, и наречено бысть имя ей Марьфа. Того же лета волыньскый воевода Стефан и угорьскый царь и ляцькый литовьскый князь, великыи король Андрей со всеми своими князми, и понаимовавше множество жолнырей немецких, идоша на поганого царя турецкого и отнята преже Белгород и по том Келию град волыньскый, и поидоша за Дунай сухою дорогою к Царюграду; и не вемы что будет по сих. Того же лета князь великый Иоан Васильевич посла своего царевица с множеством Тотарь и воевод своих московскых с множеством вой; они же, шедше, взяша Казань.
В лето 6994 (1486). Князь великый Иван Васильевич разгневася паче перваго на князя тферского Михаила Борисовича, а не вемы про что, то Бог ведает, и они сами в себе. Токмо нечто мало слышах от етера мужа: яко по первой брани, добивши чолом князю великому и в всю волю вдався, как любо великому, и перевета не держати ему к королю на великого, и о всем том крест поцеловал, и по том нача грамоты слати к королю; и с таковыми листы поимаша послов его люди князя великого, и уведа вся льстивая съветованиа их на себе. И уведавь сиа князь тферскый, яко не утаися лесть его, и нача многы послы слати к князю великому с чолобитием, и чрез все лето; и не успеша послове его ничто же. И тако князь великый Иоан Васильевич посла преже сына своего Ивана, и по том вседе сам на конь, с множеством войскым прииде к Тфери; а князь тферскый Михайло Борисович, видев свою погыбель, и за 5 дний побрав свою казну, побежа из града в Литву, а тферичи отвориша град и выдоша противу великого князя с кресты, и добиша чолом. И тако вниде в град и не повреди ничего же; и владыка тферскый Васиан, и бояре, и купци, и вси мужи, мал и велик, поцоловаша крест; и князь великый, посадив наместникы своя, сына своего князя Ивана, отъиде на Москву и възврати оружие свое бес крови, а княгиню Борисовую с собой сведе.
Тоя же осени владыка Генадий приела в Псков боярина своего Безсона и с ним игумена Еуфимия, иже преже был в Пскове ларником; и в той власти много зла народу учини, и смяте всемь Псковом, и у посадников, и у ябедников, и у правых людей того ради Есипа ларника много посекоша дворов, и самого много казнивше выведоша на посечение; он же у бежа и пострижеся. И мысляше того владыка Генадий вместити архимандритом, в себе место правителем Пскову, и того ради посла его с своим боярином и веляше описати по всей земли Псковской церкви и манастыре, и колико престолов и попов и всех в число написати; и псковичи не вдашася в волю его. Тоя же осени, в неделю, пред Въздвижением князь псковскый Ярослав Васильевич и с нимь посадники псковскыа Иван Агафонович, Иаков Афанасьевич, и Василеи Логинович, и Зиновий Сидорович, и Козма Ондронович, и с ними бояр честных много ехаша на Москву и биша чолом князю великому Ивану Васильевичу о своей проступке, что били смердов, чрез повеление князя великого казнили. И осподар князь великий Иоан Васильевич всей своей нелюбке Пскову отдал, и пожаловал повелел по всей старине Пскову жити. И тако посадники взъвратишася с великою радостию и поведаша посольство на само Фи липово заговение . А князь Ярослав тогда остался на Москве и тамо оженися; и по том приеха в Псков и с собою приведе княгыню, и приехаша с ним посадники Левонтей и Стефан и Василеи; и тако уляже брань о смердах. Ведомо же буди, яко се уже четвертин послы на Москву, а пятое два гонца, их же убиша розбойники тферскии; а все то слаша псковичи о смердах, и много напасти учинилося, яко до 1000 рублев; и о том вся земля мятешеся по два года. И по том, по мале времени, прилучися некоему попу у Норовъскых смердов чести грамоти; и наиде тую грамоту, како смердам из веков вечных князю дань даяти и Пскову и всякий работы урочный по той грамоте им знати. А о той грамоти смердьи всей земли смятенье бысть, что они, потаивши грамоти, не потягнуша на своя работы, а псковичамь не сведущем о них, како от начала бысть, а они обольстиша князю великому и о том все покриву сказаша. И таковую грамоту смерде исторже у попа из рук и скры; псковичи же посадиша того смерда на крепости. И оттоле начаша, ис пригородов приездя и изо всех волостей обиднии люди бити чолом посадником псковскым и всему Пскову на наместников князя Ярослава; а сущий в Пскове много обидных людий биша чолом на самого князя Ярослава. Посадники же и всь Псков собраша многия обиды, их же невозможно исчести за множество, и написавше грамоты многы обидныа, и отрядиша послы, посадника Микиту Ларионовича и посадника Андрея Ивановича, и боярина Андрея Семеновича Рублева, и иных бояр, ис пригородов по два человека, и обиднии люди. И, ехавше, биша чолом князю великому и поведаша о смерде, что грамоту потаил: «И имеемь его и тепере на крепости; и как нам господарь укажеши о том». И князь великий яром оком възрев, рече: «Давно ли яз вам о смердах вины отдах, а ныне на то же наступаете». И оттоле ни единыа жалобы на Ярослава не прият и ответ дал: «Се яз посылаю по вас ужьже своя бояры, и прикажю им о всех ваших делах». Посадники же приехаша в Псков, месяца нуля в 8 день, и правиша посолство свое на вечи. Тоя же зимы, на Фарисиской неделе в Четверг, генваря в 19 день, на память преподобнаго отца Макарья по псковскому чолобитью приеха в Псков пресвященный архиепископь Великого Новаграда и Пскова владыка Генадий и с ним бояр много. А князь Ярослав, и посадники, и бояре, и священноиноки, и священьники, и диакони выидоша противу его с кресты и сретоша пред враты градными, за старым Възнесением, и того дни литургию съверши в святей Троици; и, пришед на вече, народ благословил. И пребысть в Пскове 3 недели; и на Федорове недели в среду, пришед на вече, народ благослови, и многа словеса учителная простер, вдасть грамоту и отъеха прочь и з бояры.