Поучение Алексия митрополита, XIV в.

ПОУЧЕНИЕ АЛЕКСИЯ МИТРОПОЛИТА ОТ АПОСТОЛЬСКИХ ДЕЯНИЙ К ХРИСТОЛЮБИВЫМ ХРИСТИАНАМ
Отче, благослови!
Хощу вам, братия, воспомянути душеполезная и спасеная. Понеже, убо, дети, должен есмь вас пасти и учити порученную ми паству, якоже пишет Павел Апостол к Тимофею, епископу Критскому: «Чадо Тимофею! Учи, моли, запрети в время и без времени». Темже убо, дети, да будет от вас всяк скор на послушание, а медлен на глаголание, позден в гнев: гнев бо мужеск не соделывает правды Божия.
Первое, дети, предлагаю вам притчу не ложных уст Спасовых, якоже рече в своем Евангелии: «Се изиди сеяй сеяти семе не своего. Ово паде при пути, а другое на камени, а иное в тернии, а ино на добрей земли». Семя есть слово Божие истинное, а земля – сердца человеческие. Да не будет убо, дети, земля сердца вашего терновата, леностию и небрежением не творящи плода духовного, или окаменена – безстрашием Божиим, и при пути – пристрастием жития супостату нашему дьяволу в попрание ногама его, егоже да избавит ны Господь. Но да будет земля сердца вашего блага на приятие Слова Божия истиннаго, Евангелия, творяще плод душевный, ово тридесять, ово шестьдесят, ово сто.
И паки ину притчу речет Господь в Своем Евангелии: Человек бе домовит, иже насади виноград, и оплотом огради, и созда столп, и ископа точило, и предаст и делателем, да во время плода отдадят господину своему. Человек есть Христос Бог наш: ельма бо Бог и человек бысть, с человеки поживе спасения ради нашего, по всему подобству, разве греха, якоже светлый наш учитель Павел Апостол пишет. Иже аще кто не исповесть Иисуса Христа Сына Божия, во плоти пришедша Бога и человека, тот несть Божий, но антихристов. А виноград насади – человечество на земли. И оплотом огради, рекше Законом Своим Божественным. И созда столп – Церкви Божественныя. И ископа точило – излия Честную Свою Кровь, нашего ради спасения, верным людем на спасение и на приятие Царства Небесного. И предаст делателем – святым Апостолом, и святым Отцем, Патриархом, и Митрополитом, и Епископом, и всему священническому чину, – да упасше и научивше люди закону Божию и рекут во Второе пришествие Христа Бога нашего: «Господи! се мы, и дети, яже еси дал нам».
Темже и аз, грешный, сподоблен бых сему святительству, рекше епископству, не по моему достоинству, но по Божьим щедротам и по великой Его милости, еже или на ны обильно, – сподоблен бых быти вам, детем моим, пастух и учитель, пасти и учити порученное мне стадо словесных овец. Темже, дети, вспоминаю вы Спасово слово, еже рече своим учеником и Апостолом: «Си заповедаю вам, да любите друг друга; и о сем вси познают вы, яко мои есте ученици, и аще пребудете в любви. Такоже и вы, дети, имейте между собой мир и любовь.» О том бо и Павел Апостол вопиет и галголет: «Весь закон единем скончевается, еже любите друг друга, и ближнего своего аки и сам себе. Такоже, дети, имейте страх Божий в сердцах своих: тем бо может человек всяку добродетель стяжати. Начало бо, рече, премудрости страх Господень». Такоже и Григорий Богослов пишет: идеже боязнь Господня, ту плоти чищение, и заповедем Божьим соблюдение; идеже заповедем соблюдение, ту душе возвышение в Горний Иерусалим. А заповедем Божьим соблюдение бывает таковыми делы: покаянием чистым от души о своих прегрешениях на всяк день, милостынею, и удалятися от неподобных дел, еже суть кроме закона Божия: от блуда, от пиянства, от грабления, от насилия и чародейства, и волшвения и всяких кобей (имеется в виду ворожба, гадания), и от несытства богатства, и от всякого злаго имения, иже прибывает души на вред. Имейте же, дети, в уме своем смерть и воскрешение, и суд, и отдаяние комужду по делом, по Спасову слову, якоже рече: «Сотворившие благая во воскрешение животу, а сотворшеи злая воскрешение суду».
А князи и бояре и вельможи, судити суд милостиво: суд бо без милости есть не сотворившему милости, хвалится милость на суде; мзды на неповиных не приимайте и не на лица судити, суд бо Божий есть; судите людем вправду, и вдовиц и сирот и пришлиц не обидите, да не возопиют на вас к Богу.
А людская чадь Бога бойтеся, а князя чтите, а святительство имейте выше своея главы, со всяким покорением, без всякого прекословия, ти бо печалуют день и нощь о душах ваших, понеже воздати им ответ Богови о пастве своей. Восхочет ли кто небреженьем своего спасения лишитися и вечнаго живота, а не внимая себе слова Спасова, еже рече в Своем Евангелии: «Придите ко Мне вси труждающии и обременении и Аз покою вы?» Зовет ны Христос в Царство Свое Небесное и велит оставляти тружание бремени греховнаго покаянием, чистым сердцем. Притецыте ко иерею, отцу духовному, с покаянием и со слезами. Отверзите от себе вся дела злая и опять не приступайте к ним: то бо есть истинное покаяние, еже возненавидети первый грехи. И видев таковое дерзновение, иерей может очистити и приближити к Богу, и причастника сотворити Телу и Крови Христове. Святители бо и иереи ходатаи суть между Богом и человеки. Понеже же немощию обложен, приносят жертву Богови о себе и о людских прегрешениях. Темже, чада, с потщанием будите милостивы и отдатливи, якоже учит ны великий Апостол Иаков, брат Божий: суд бо без милости есть не сотворшему милости. И ныне, чада, елика сила ваша может – исполнивати закон Божий, не словом, но делом, якоже рече Спас: «Что Мя зовете: Господи, Господи, а не творите воли Моея?» И: «Отъидите от Мене: не веде вас». Вы же, чада, восприимайте в души ваша и пишите на сердца ваша Евангельский речи, Апостольские проповеди, и святых Отец управления.
А к церковному пению будете, дети, спешни, утекаяся друг пред другом, якоже Иоанн Богослов пред Петром ко Гробу Христову. Православные христиане! Оставя вся дела своя, на церковную молитву стекайтеся без лености и не рците тако: отпоем себе дома. Не может бо та молитва успети ничтоже без церковной молитвы. Якоже бо храмина дымом без огня не может согретися, тако и та молитва без церковной. Церковь бо наречется земное Небо, в нейже заклается Агнец, Сын, Слово Божие, за очищение грехов всего мира верных и людий, трепещущих словес Божиих, в нейже проповедается Евангелие благовещения Царствия Божия, и святых Апостол деяния, и Соборная послания, и светлого нашего учителя Павла Апостола 14 посланий, и святых Вселенских Отец 7 Соборов почитаются, и Престол Божия Славы Херувимы невидимо осеняется, и священническими руками Тело и Кровь Божественная приемлется и верным людям подается на спасение и на очищение душам и телом. И таковое страшное и грозное и преславное чудо Божие, еже есть церковное управление, – и хощете домашним своим пением обрести себе пользу?
Тогоже, дети, разсмотревше, прежних тех словес, пострашите сердца ваша, воймите себе в разум и прикладайте свою молитву домашнюю к церковной молитве. Егда, дети, приходите в церковь, имейте со всеми мир и со всеми любовь, якоже рече Спас: «Егда принесеши дар твой к олтарю, иди преже и смирися с братом своим». А входя в церковь, потрепещи душею и телом, понеже не в простый храм входиши. Аще бо, дети, тако творите, то и молитва церковная за вас приидет. С боязнию и благоговением и со страхом Божиим в церковь входите, получивше прощение грехов.
В церкви же егда стоите, помышляйте о своих прегрешениях; в таковое время оставляйте за собою вся дела вне церкви, якоже святии пишут. Откровением Святаго Духа, изложили Божественную службу Великий Василий Кесарийский, Иоанн Златоуст, Григорий Двоеслов: «Станем со страхом. Возлюбим друг друга, сердечною любовию, а не усты и языком». И: «Всякую ныне житейскую отверзем печаль, ныне бо Силы Небесные с нами невидимо служат». Не можете же, дети, прогневати Бога говорением своим в церкви. Но да будет сердце ваше земля блага, приемлюще слово нашего учения.
Занеже, дети, аз должен есмь, прием от Бога талант, не крыти его в земли, но раз дати вам, добрым торжником. И куплю духовную творити с прибытком, да и аз с великим Апостолом Павлом дерзнул бых рещи в день Судный, ихже научив, рече: «Вы похвала моя, вы и радость, вы и венец мой пред Богом». Такоже бы и мене грешнаго сподобил рещи Бог, во Второе Его пришествие, с вами, со своими детьми: Господи! се аз, и дети, яже ми еси дал. И ныне, дети, Бога ради, потщитеся всяко угодити Богови добрыми делы, и души свои спасти, и гнев Божий утолити и себе приближите к Богу.
Да имели бысте, дети, знамение Христово в душах ваших, якоже пишет Георгий Богослов: «Овца знаменана неудобь украдома бывает». И знамение же овцам словеснаго стада Божия се есть, еже быти причастником Телу и Крови Христове. Вы же, дети, словеснаго стада овцы, не пропустити ни котораго говения без того знамения, но будите причастници Телу и Крове Христове.
Се же, дети, вкратце писахом вам, но вы своим Богоразумием распространите в сердцах ваших плод духовный. Приточник бо рече: «Аще таковым коварством рекше: учением поживете и приложатся вам лета живота». Такоже, дети, и вы аще приимете и соблюдете в сердцах ваших, еже писахом вам, и исполните не словом точию, но делом, и будете причастници Небеснаго Царствия, ему же всех нас Бог да сподобит во Второе Его пришествие, со всеми угодившими Ему от века, быти общником Горнему Иерусалиму, славяще в Троице Отца и Сына и Святаго Духа, ныне, присно во веки веков. Аминь.