Грамота кн. Едигея кн. Василию Дмитриевичу

ГРАМОТА ОРДЫНСКОГО КНЯЗЯ ЕДИГЕЯ
ВЕЛИКОМУ КНЯЗЮ ВАСИЛИЮ ДМИТРИЕВИЧУ
От Едигея поклон Васи лью, да и много поклонов. Как те поклоны придут к тебе, царев ярлык: учинилось таково со царевичи и со князми, по думе царевичев и князей, и меня с ними посылал царь, Тахтамышевых для детей. Слышание учинилось таково, что Тахтамышовы дети у тобя, и того ради пришли есмя ратью . Да еще слышание наше тако, что ся неправо у тоби чинит в городех, послы царевы и гости из Орды к вам приездят, а вы послов и гостей на смех подымаете, да аще велика обида, истоми им от вас чинитца: ино то недобро. А преж сего улус был царев и страх держал и без обиды. И ты б спросил старцов старых, как ся деяло преж сего, и ты ныне того не дееш, а со старцы не спрашиваеся: ино то коли добро, как ты чинишь? Как царь Темир Котлуи сел на царство, а ты улусу государь учинился, от тех мест у царя еси в Орде не бывал, царя еси в очи не видал и князей его, ни бояр еси своих старейших и молотчих, и иного ни коего не присылывал, ни сына, ни брата ни с каким словом. И потом Щадибек восемь лет царствовал, и у того еси також не бывал и никого (ни с которым же словом) не присылывал. И потом. И Щадибеково царство такоже ся минуло. И ныне Булат Салтан сел на царство и уже третей год царствует; також еси сам не бывал, ни сына, ни брата не присылывал, ни старейшего боярина, а нат толиким великим улусом стареиши еси Великий князь, а вся твоя дела недобрыя и неправыя. Добрый нравы и добрая дума и добрыя дела были к Орде от Федора от Кошки – добрый был человек, – которые добрые дела Ординские, то и тобе возспоминал, и то ся минуло. А ныне у тебя сын ево Иван, казначеи твои и любовник, старейшина, и ты ныне ис того слова, ис того думы не выступаешь. Ино того думою учинилось твоему улусу пакость и крестьяне погибли, и ты б опять тако не делал, а молодых не слушал, и собрал бы еси старейших своих бояр Илию Ивановича, Петра Констянтиновича, Ивана Микитича, и хочеш на своем улусе княжити, и ты б тех бояр, да иных многих старцов воземских, да думал бы еси с ними добрую думу, кояб пошла на добро. Да от тех бы еси от своих бояр единаго прислал к нам старыми оброки, как давал царю Жанибеку, дабы твоему улусы шкоты не было и чтоб твоим крестьяном малым и великим было добро, не погибли б от твоей гордости, а твоей державе до конца них тож. Аще ли ты не восхощеши тако чинити, но осваиватися восхощешь, ино ти ся работати и бегати. Добро бы ти тако быти, как бы ти прожити, и как бы ти во улусе своем жити безбедно и княжити. А обиды каковы ти не будут, или от князей Русских, или от Литвы, и ты к нам жалобныя на них шлеш еже лет и жалобныя грамоты, и оборони у нас просишь от них, и покоя в том нам от тебя нет николи, а ркучи тако, что ся улус истомил и выхода взять на ком: и мы преж улуса твоего сами своима очима не видали, толко есмя слухом слыхали. А что твои приказы и грамоты твои к нам в Орду посылал еси, то еси все лгал. А что еси имал в твоей державе со всего улуса з дву сох рубль , и то серебро где ся девает? Ино бы добро было тако, како бы тебе познатися, како бы то отдано по старине по правде, ино бы того зла улусу б и брани нашие на тебя не было ни в чем.