Осада и взятие Полоцка

ОСАДА И ВЗЯТИЕ ПОЛОЦКА
И пошел царь… ко граду Полотцку и знамя повеле развертети… И прииде в озеру к Волову и поставил полк свой у Волова озера против города. И повеле в сурны играти и трубити и по накром бити, а в ту пору велел коши уставливати… Повеле же царь… того дни от своего полку ставити наряд и стрелецким головам с стрелцы стати и закопатися в Двины-реки в березех и на острову . И царевы… пушкари и стрелцы из наряду с острогу пушкарей збили и литовских людей многих побили в остроге. А воеводы левые руки и сторожевово полку и с нарядом воеводы пришли к Полотцку того же дни… генваря в 31 день к вечеру, и стали по своим местом…
И царь… велел по острогу и по городу из болшово наряду стреляти и учал советовати, как бы над острогом промыслити, что острог крепок; а рублен острог и всякими крепостьми делан по тому же, как и городная стена рублена [главной крепости], да и ров вкруз острога от Полоты и до Двины-реки делан крепок и глубок. И из-за Двины-реки повеле стреляти в острог и по Острожным воротам, понеже бо от Двины-реки острожные стены не было. А в которую пору полочане с лестными словесы из города говорити и высылали, а в то время по государскому приказу воеводы туры блиско Острожных ворот и острожные стены и наряд за турами поставили, и пушкари и стрелцы под турами стали. Февраля в 9 день воевода Полотцкой Довойна и ляхи большой острог… и в остроге церкви и гостины дворы и лавки в торгех и все острожные дворы зажгли во многих местех, а посадских людей из острогу учали забивати в город . А стрелцы царевы… и боярские люди и казаки в острог вошли… и с ляхи учали битися… И государева царева… полку головы… ляхов в остроге потоптали и в город вбили… А которые люди Полотцково повета селские сидели в остроге, и те в город не пошли, а вышли в государской полк и воеводские полки; а вышло их в один государской стан мужска полу 3.907 человек, а жонок и,девок 7.253 человеки, и обоего 11.160 человек; а по воеводским полком и в татарские станы вышли из острогу, и тем же не бе числа. И животов бесчисленное множество поймали, а острог болшой весь згорел, а дворов в остроге згорело 3.000. Царь же… видя полочан лестьное их челобитие к себе… повеле над городом делом своим промышляти болшим и приказал боярину князю Михаилу Петровичу Репнину против Великих ворот в остроге на пожженом месте пушки болшие, Кашпирову да Степанову да Павлик да Орел да Медведь и весь наряд стенной и верхней поставити блиско городских ворот; а вкруз города и городные стены за Двиною и за Полотою по тому же велел болшой наряд изставити и со все стороны бити без опочивання день и нощь. И из наряду во многих местех вкруз города стены пробили, и ворота выбили, и обламки з города позбили, и людей из наряду побили, якоже от многого пушечнего и пищалного стреляния земле дрогати и в царевых великого князя в полкех; бе бо ядра у болших пушек по дватцети пуд, а у иных пушек не многим того полегче. Городная же стена не удръжашеся, но и в другую стены ядра прохожаше. Полочане же со града никоторым пушечным и пищалным боем не промышляли и из города ни на какову стравку не выежживали, но токмо крыящеся в домох своих, в погребех и в ямах от пушечново и пищалново стреляния… нападе бо на них страх и ужас и ничим же противитися могуще… А февраля в 13 день, в суботу, и в 14 день по государскому наказу изо всего наряду били без опочивання день и ночь… Тоя же ночи стрелцы городовую стену зажгли во многих местех, и городовая стена учала горети… И тоя же нощи часа за два до света прислали ко царю… бояре и воеводы… с тем, что з города кличют и владыка и воевода Полотцкой Довойна город государю здают, да и знамя городцкое з города здали; а то знамя прислали воеводы ко государю с Ываном с Кобылиным… И февраля в 15 день, в понеделник, за два часа до вечера… государевы воеводы… в город въехали и на королевском дворе стали и город устроили по государеву… наказу…