Жалованная грамота кн. Александра Ивановича Благовещенскому монастырю

ЖАЛОВАННАЯ ГРАМОТА КНЯЗЯ АЛЕКСАНДРА ИВАНОВИЧА
БЛАГОВЕЩЕНСКОМУ МОНАСТЫРЮ.
Ок. 1418 г.
Святого для Благовещениа се аз князь Александр Иванович пожаловал есмь игумена благовещенского з братьею . Что люди монастырские пошлые в городе и в селах, коли придет моа дань, и игумен за них заплатит по силе. А опричь того не надобе им ни мыт, ни тамга, ни побережное, ни костки, ни осмничее . Ни становщики, ни езовики не ездят ни по что, ни езу ими не бити, ни лугу им не Косити . Ни наместници мои к тем людем не всылают, ни судят их, ни доводщики к ним не въежжают, ни по что, оприче душегубства и разбоя, ведает и судит их игумен или кому прикажет . А будет суд смесной , и наместници мои судят, а игумен с ними, или кому прикажет. А тутошных людей становых игумен в монастырь не принимает. А кого к себе игумен призовет людей из иного княженья, а не из моее отчины, и тем людем пришлым не надобе моа дань на десять лет, ни ям, ни подвода, ни мыт, ни тамга, ни инаа никоторая пошлина . А уживут десять лет, и они потянут с старожильци по силе. А к тем же людем также наместници мои не всылают, ни судят их, судит игумен свои люди сам или кому прикажет. А случится суд смесной, и игумен судит с наместники, а прибытком ся делят наполы . А через сию грамоту кто их чим изъобидит или что у них возьмет, быти от меня в казни. А дана грамота июля того лета, коли князь Александр Иванович сел на своей отчине на Новегороде. А на которую грамоту свою грамоту дам, а на сю грамоту грамоты нет.