Договор кн. Дмитрия Ивановича с тверским кн. Михаилом Александровичем, 1375 г.

ДОГОВОР ВЕЛИКОГО КНЯЗЯ ДМИТРИЯ ИВАНОВИЧА С ТВЕРСКИМ ВЕЛИКИМ КНЯЗЕМ МИХАИЛОМ АЛЕКСАНДРОВИЧЕМ. 1375 Г.
По благословению отца нашего Алексия, митрополита всея Руси, на сем, брате молодший, князь великий Михайло Олександрович, целуй ко мне крест, к брату старейшему, князю великому Дмитрию Ивановичю, и к моему брату, князю Володимеру Андреевичю, и к нашей вотчине к Великому Новугороду, и за свои дети, и за свои братиничи .
Имети ти мене братом старейшим, а князя Володимера, брата моего, братом. А добра ти нам хотети во всем, везде, без хитрости. А што ты слыша ото крестьянина или от поганина о нашем добре или о лисе , а то ти нам поведати въ правду, по целованью, без хитрости.
А князи велиции крестьянстии и ярославьстии с нами один человек . А их ти не обидети. А имешь их обидети нам, дозря их правды, боронитися с ниме отъ тобе с одиного. А имут тобе обидети, нам, дозря твоие правды , боронитися с тобою от них с одиного.
А где ми буде, брате, поити на рать , или моему брату, князю Володимеру Ондреевичю, всести ти с нами самому на конь без хитрости. А пошлем воевод, и тобе и своих воевод послати.
А вотчины ти нашиє Москвы, и всего великого княженья, и Новагорода Великого, под нами не искати и до живота , и твоим детем, и твоим братаничем.
А людии ти нашим московьских, и всего великого княженья, и Новагорода Великого, и новоторъжських блюсти, а не обидети, как и своих. А закладнеи ти в нашей вотчине, в великом княженьи, не держати, ни грамот не давати.
А имут нас сваживати татарове , и имут давати тобе нашу вотчину, великое княженье, и тобе ся не имати, ни до живота. А имут давати нам твою вотчину Тферь, и нам ся тако же не имати, и до живота .
А в Кашин ти ся не въступати, и что потягло к Кашину, ведает то вотчичь князь Василеи…
А жити нам, брате, по сеи грамоте. А с татары оже будет нам мир, по думе. А будет нам дати выход , по думе же, а будет не дати, по думе же . А пойдут на нас татарове, или на тебе, битися нам и тобе с одиного всемъ противу их. Или мы пойдем на них, и тобе с нами с одиного поити на них…