Жалованная льготная грамота, 1453 г.
Жалованная льготная грамота
людям деревни Микулинской (Тутолмина),
принадлежащей Троицкому Сергиеву монастырю, 1453 г. окт. 15.
По мтри своей грамоте великие княгини Софи, се из княгини великая Мария пожаловала есмь Благовещенского игумена Протасия с братьею или кто по нем иныи игумен будет от великие Троци: что их деревня Микулинская Тутолмина и моей волости в Маринине слободке, и которых людей игумен Протасей призовет к себе в ту деревню из иных княжен, а не из великог кнжниа, ни из моих сел кнги великие, или которые люди у них туто живут тутошние старожилци, и тем ег людей инокняжцем и тутошним старожилцем ненадобе ни нисчяя белка, ни ям, ни подводы, ни к сотнику, ни к дворскому не тянут с волостными людьми ни в которои протор, ни сен моих не косят, ни коня моего не кормят, ни портное им ненадобе, ни двора волостелева не ставят, ни иная никоторая пошлина им ненадобе; а волостели мои Марининские и их тиоуни не вылают к тем людем к пришлым и к старожилцем ни по что, ни судят их ни в чем, опроче душегубства, а и кормов у них не емлют, а доводщики и мои праведщики поборов у них не берут. А ведает и судит тех людей своих пришлых и старожилцев игумен Протасеи сам, или кому прикажет; а случится суд смесный, и волостели мои Марининские или их тивуни судят, а игумен Протасеи с ними судит или кому прикажет; а будет прав или виноват волостной члвк, и он в правде и в вине волостелю, а игумен Протасеи не вступается; а будет прав или виноват монастырскиий члвк, и он в правде и в вине игумену Протасию, а волостел или его тивун не вступаетца в монастырского члвка ни в правого, ни в виноватого. А через сию мою грамоту кто что на их людех возьмет или кто их чем изобидит, быти ему от мене от великие кнгни в казни. А дан грамота в Переяславле, в лет 6962-е октября в 15. Князь великий Василий Иванович всея Русии по сей грамоте пожаловал Троцкого Сергиева монастыря игумена Серапиона з братею или кто по нем иной игумен будет, сее грамоты у них рушити не велел никому ничем, лета 7000 четвертаг на десят, дек. 6; а подписал дьяк Данило Куприанов. Князь великий Иван Василевич всея Руси, по сей грамоте, пожаловал Троицкого Сергиева монастыря Иоасафа з братею, или кто по нем иной игумен будет, сее грамоты у них рушити не велел никому ничем, лет 7000 четыредесят второго Февраля 9 дня; а подписал дьяк Афанасий Курицин. Лета 7000 пятьдесят девятого мая в 17 день царь и великий князь Иван Василевич всея Руси сей грамоты слу… воначалные Троицы… мена Артемя з брат… пожаловал велел… Слова, означенные точками, в подлиннике отрезаны.
Напечатана в Актах, относящихся до юридического быта древней России, изд. Археографическою комиссиею, под ред. Н.И. Калачова». Т. I, (Спб. 1857), № 31, XII.
